|
Op 3 April 1973 het Martin Cooper,
adjunkvoorsitter van die selfoonvervaardiger
Motorola, ten aanskoue van ’n groep joernaliste
die eerste selfoonoproep gemaak.
Sy foon, Motorola se DynaTac, het net minder as
1 kg geweeg, was langer as 25 cm en het tien
jaar later die mark getref met ’n prysetiket van
byna $4 000 en ’n batterylaaityd van tien uur.
Met dié enkele oproep – na sy grootste
mededinger, die telekommunikasiereus AT&T –
het Cooper ons wêreld onomkeerbaar verander.
Oor die volgende klompie dekades het
selfoontegnologie internasionaal drasties
ontwikkel en ook na Suid-Afrika uitgekring.
Maar dié ontluikende tegnologie is nie oral met
geesdrif begroet nie.
In September 1993 skryf die Cape Argus-joernalis
David Biggs in sy rubriek Tavern of the Seas:
“Ek kan nie help om in my mou te lag as ek
luister na al die twak wat oor sellulêre
telefone gepraat word nie ...
Hierdie telefone sal (glo) die klein- sakeman in
staat stel om ’n telefoon by sy
groentestalletjie of in sy bakkie te hê.
Mense in plakkerskampe en informele
nedersettings sal (hul eie) telefone kry.
Loodgieters en elektrisiëns sal in staat wees om
met hul kliënte in kontak te bly waar hulle ook
al is. Asseblíéf.”
Vroeg die oggend van 1 Junie 1994 moes Biggs
waarskynlik op sy neus kyk toe Suid-Afrika se
eerste twee netwerkverskaffers, Vodacom en MTN,
hul diens aanskakel en sowat 24 000
Suid-Afrikaners vir die eerste keer oor ’n
selfoon praat.
Sedertdien is daar geen keer nie. In 2001 het
Cell C as derde plaaslike netwerkverskaffer tot
die toneel toegetree.
Terwyl Cell C net die plaaslike mark bedien, is
sowel Vodacom as MTN bedrywig in die res van
Afrika.
Vandag het Vodacom meer as 50 miljoen
intekenare, MTN byna 190 miljoen en Cell C meer
as 10 miljoen.
En ja, die kleinsakeman hét sy selfoon – van
Khayelitsha tot Katlehong is selfone g’n vreemde
verskynsel nie en vir loodgieters en
elektrisiëns is ’n foon ’n onontbeerlik item in
hul toolboxes.
Intussen, hoe sterker die selfoon word, hoe
kleiner word die toestel.
“Die selfoon is op sy dunste, gladste en ligste
tot nog toe,” sê Arthur Goldstuck van die
Randburgse tegnologienavorsingsmaatskappy World
Wide Worx. Maar, meen hy, die beste kom nog.
Die nuwegeslag-fone wat vanjaar nog bekend
gestel gaan word, is nie net slimfone nie, maar
superfone.
Verder wys hy op die tendens dat die toestelle
toenemend met mekaar gaan kommunikeer.
“Jou selfoon (gaan) met jou rekenaar ‘praat’ en
binnekort gaan toestelle soos jou kamera, GPS en
selfs motorradio ook kan ‘saamgesels’...”
* Lees ook die hoofartikel.
Kliek op die grafiek vir 'n
groter weergawe
|
|
